Diqqətinizə çatdırırıq ki, Azərbaycan Yazıçılar Birliyinin və Azərbaycan Jurnalistlər Birliyinin üzvi, filologiya elmləri üzrə fəlsəfə doktoru, muğam irsimizin tədqiqatçısı, yazıçı Gülhüseyn Kazımov 24.02.2024 tarixində dünyasını dəyişdi. Qeyd edək ki, Gülhüseyn Kazımov Sübhan Köçərlinin dəvəti ilə Azərbaycanda ilk dəfə baş tutan “Dünya Akkordeon Günü” və instrumental tariximizdə ilk dəfə olaraq reallaşdırılan qarmon.az saytı kimi beynəlxalq layihələrdə fəxri qonaq qismində iştirak etmişdir. Onu da qeyd edək ki, mərhum Gülhüseyn Kazımov “Dünya Akkordeon Günü” münasibətiylə baş tutan "Azərbaycan qarmonu" adlı konsert proqramındakı (14.05.2022) çıxışı zamanı həmin günün (14 may) məhs "Azərbaycan Qarmonu Günü" olaraq hər il qeyd olunması fikrini irəli sürmüşdür və digər fəxri qonaqlar da öz alqışları ilə həmin fikri dəstəkləmişdirlər. Beləliklə, ilk dəfə olaraq 14.05.2023 - cü il tarixindən etibarən hər il 14 may gününün "Azərbaycan Qarmonu Günü" olaraq qeyd olunmasına başlanılmışdır. O cümlədən, mərhum Gülhüseyn Kazımov, Əhəd Əliyevin (kor Əhəd) nəticəsi, soprana, səs tədqiqatçısı, pedaqoq Aleksandria Sultanla birgə hazırladığı mərhum ustad sənətkarımız Əhəd Əliyevin həyat və yaradıcılığından bəhs edən “Qarmonun əfsanəsi” adlı çox dəyərli kitabın da müəllifidir. qarmon.az olaraq rəhbər və kollektivimiz adından mərhum Gülhüseyn müəllimin ailəsinə, yaxınlarına dərin hüznlə başsağlığı veririk! Allah rəhmət eləsin!

Foto qarmon.az saytının təqdimatı zamanı çəkilib. Xatırladaq ki, təqdimat 10.09.2023 – cü il tarixində Heydər Əliyev Mərkəzində (Sumqayıt) baş tutmuşdur (bax: Təqdimatlar)! Fotoqraf: Orxan bəy.